List

 دوم اوخویاندا ، ائویمیز دیکباشیندا ، مسگره بازار اولان کوچه نین باشیندایدی. بیر ایکی مرتبه لی ائو کرایه ائله میشدیک. آشاغی طبقه بیزیمید . اوست طبقه ده آقا میراسماعیل عمی گیلینیدی. بیز آقام ، آنام ، اورقیه آنام ، باجی قارداشلاریم بیرده یوسوف داداشیم نان بیر ائوده یاشیردیق. یوسوف داداشیم عمی اوغلوموزویدو . آما بیز عمی اوغلو عمی قیزیلاریمیزین دیلیجن ، اونا داداش دئیردیک . داداش چوخ ساکت ، مهربان هابئله درس اوخویانیدی.هئچ واخ بیزنن ساواشمازدی. هئچ بیریمیزین ده اوستونه ال قاوزامازدیهردن منه دیکته دییردی ، غلطلریمی بیر گرزل یازایب اؤرگده ردی.

مدرسه میزین آدی « فرهنگ » ایدی . بیزیم مدرسه ملی بیر مدرسئیدی. هر آی آقام مدرسییه ایلیق وئره ردی. معلیمیمیز ، هر جوماخشامی دا مدرسه نین بابا سینا ، ننه سینه ده بئش قیران یادا ایکی قیران پول ییغاردی. بو مدرسه راستاکوچه نین ایچینده اولان ، جودی کوچه سیندئیدی. بیر کهنه ائو ائشییدی . کلاسلاریمیز ، بیری بیرینین ایچینده اولان اتاقلاریدی. کوچه قاپیسیندان ایچری کی گیریردین، بیر خیردا قه فخانایدی. قه فخانانین ساغی بیر خانیم مدیرین اتاغیدی. سولوندادا بیر قاپی واریدی . قاپی دان ائشیه کی چیخیردین ، بیر خیرداجانا حیاطیدی . حیاطین ایک اوچ پیلله سی وارید. سورا بیر خیردا دالانیدی . دالانین ساغی کلاسلارین قاپی سیدی . کلاسلار بیری بیرینین ایچیندئیدی. دالانین سولوندا دا حیاط قاپی سی واریدی . حیاط قاپی سیندان ائشیه کی چیخیردین ، بیر سکی ایدی . سکی دن حیاطا دؤرد – بئش پلله حیاطا یئییردی. حیاطین ساغیندا گئنه بیر دهلیز واریدی . دهلیز ایک اتاغا چیخیردی . اوست طبقه ده ده بیر دانا اتاق واریدی. هامیسیندان قورخولوسو ، ماوالیدی. ماوال یئرین آلتیندایدی. نه بیلیم بلکی ده اون – اون بئش پیلله ماوالا یئییردی. ماوالین ایکی داشی واریدی. بیرده بیر تلسیندن پرده سی واریدی . یانی کی قاپیسی یوخیدی. اون دیقه سیاحت زنگینده بیلمیردیق نئجه نوبییه دوروب ماوالا گئدک. نه قدیر صفه دوزولن واریدی آللاه بیلسین. بو مدرسه ده هر نه بیر یانا ، قیشین سویوغودا بیر یانا. قیش دا نفت نن یانان پینج لری قوراردیلار. بیلمیرم نئجه یاناردی – یانمازدی کی همیشه اللریمیز سویوخدان دوناردی. نه ظولومنن درس اوخوردوق اللاه بیلسین.

اوزامانلار مدرسه اوشاقلارین دؤیمک ، تزه بیر دب دئییلیدی. درس اوخومویان اوشاقلار. شولوخلوق ائیلیین اوشاقلار کوتک یئیه ردیلر. بیزلری خط کش نن ووراردیلار. هله کوتک یئین دن سورا دا قادیریمیز یوخویدومعلیمی ، ناظیمی ،  آتا آنامیزا چوولدویاق. اونلاردا بیزی ووراردیلار کی دئی گؤروم نئینه میسن کی ووروبلار. هله بیرده  بیر مدرسیه گلنده معلمه تاپشیراردیلار کی اتی سنین سومویو منیم. معلم لرده ائله دوغوردان دئیردیلر به اتیمیز اونلارین دی.من الیفین یازدیم سیز گیلیفین  بیله سیز.

معلیمیمیز هر گون سحرچاغی کلاسا گلمک همه ن مشق لریمیزه باخیب جیزاردی. اوناگؤره ده هر گون سحر خط دفترلریمیزی نیمکتین اوستونه قویوب االریمیزی دیزیمیزین اوستونه قویوب اوتوروب معلیمین گلمه یین گؤزلردیک. گونلرین بیر گونونده ، دئمه بس من بوتون خط لریمی تلسه – تلسه و غلط غولوط یازمیشام. گؤردوم ها ! منیم یانیمداکی یولداشیمین ایکی گؤزو وار ایکی سینی ده تپه سینه قویوب منیم دفتریمه باخیر، اما اؤزومو هئچ اویانلیق قویمادیم کی بو منی چوولدویا. معلم کلاسا گلدی ، قیرمیزی خودکاری الینه آلیب باشلادی خط لریمیزی تئز – تئز جیزماغا. منه یئتیشنده، یانیمدا اوتوران قیز ، شئطان شاپالاغی کیمی آیاغا قالخیب بارماغین قاوزییب دئدی : خانیم معلم اجازه؟

خانیم معلیم دیئی : ناوار؟ دئی گؤروم؟

قیز دئدی : خانیم اجازه ؟ شهربانو خطلرینی غلط غولوط یازیب

معلم کی بیر ایکی صفحه نی قره له میشدی ، چؤوروب بیرده باخدی . سورا منی تخته نین قاباغینا چاغیردی. اوزون چووروب اوشاقلارا دئدی : بیلیرسیز من خطلرینی غلط یازان اوشاغینان نئینه رم.

اوشاقلارین سسی بیردن کسیلدی . خانم معلم خط کشی الینه آلیب مندن ایسته دی کی الیمی آچام . اللریمی آچدیم. خط کشینن محکم اللریمین اوستوندن ووردو. اووجومون ایچی قیپ قیرمیزی اولموشدو. اللریمی دالی چکدیم امما خانیم معلم قیشقیردی کی : الیوی آچ.

من بیرده الیمی آچدیم خانیم گئنه ووردو. اؤز عالمیمده دای دؤزه بیلمه دیم. آغلیا – آغلیا دئدیم : خانم معلم بسدی دا.

آمان آللاهیم . خانم معلم دلی اولوب دئدی :  آنلامامیشام یئرینه بسدی دا دئییرسن؟ الیوی آچ گؤروم.

بیرده الیمی آچدیم . بیرداها ووراندا دا دؤزه بیلمدیم . آخی آغاج آجی دی جان شیرین. اللریمی قولتوغومون آلتیندا گیزلتدیم. آما بیلمیرم نه اولدو کی بیراوندا اؤزومه گلدیم کی خیرداجا اللریمنن خانم معلمین دوشوندن وورورامو آغلیا – آغلیا دئییرم : بسدی دا – بسدی دا.

چوخ گئچمدی کی خانم ناظم ده نم هایاندان تاپیلدی. بیر یاندان کی بیر الینن منیم بیله کیمدن یاپیشمیشدی ، بیر الینن ده خیرداجا اوزومه شاپالاقلار ووروردو، منی سوروتدویه – سوروتدویه دفتره آپاریردی. آما دفتر نه دفتریدی؟ بیز او دفتره مدیر اتاغی دئیردیک . مدیر اتاغیندا بیر خیرداجانا آنبار واریدی. دئییردیلر کی شولوخ اوشاخلاری ، درسه باخمیان اوشاخلاری ، بی ادب اوشاخلاری ، او آنبارا قاتیرلار بلکی عقربلر، روتئیلا لار سانجالار. بیلیردیم کی ایندی منیم ده یئریم او آنباردی. قورخومدان آز قالدی تومانیمی به لییم. لاپ دوغوردان دا آغزیم اییلمه یه باشلادی. دئیه سن خانم ناظمین الینی دیشله ییب ، جانیمی قورتاریب خیابانا قاچمیشام. ندجه قاچیرام کی یئره ییخیلسام واللاهی باللاهی کی تیکه پارچا اولاجایام.اؤزومو ائویمیزین قاپیسینا یئتیردیم. قاپینین قاباغیندا دوردوم. بس ایندی من نه چاره قیلیم؟ ائوه گئتسم آنام دؤیه جک ، مدرسیه قاییتسام عقربلر ، روتئیلالار سانجاجاق. ائله یاخجی سی بودور مدرسه واختی قورتولونجا قاپی قاباغیندا دورام. ائله اوجورسوده ائله دیم. ائویمیزین اوتای بوتایی باققال ، مسگر خره زی توکانیدی. باققال دئدی : قیزیم ، به ائوه نییه گئتمیسن؟ الین کی قاپییا یئتیشیر . قاپینی دؤی. گئد ائوه. آدام ائشیک ده قالماز.

باققالا جواب وئرمه دیم . هلبت اؤزو ده بیلیردی کی مدرسه دن قاچمیشام. بیرآز قاپی قاباغیندا دوراندان سورا ، بیردن بیره گؤزوم مدرسه میزین مبصوروینن  ننه یه ساتاشدی . رنگی روفوم آتدی قورخومدان تیتره دیم . قاپینی دؤیدوم .آنام قاپینی آچماق همه ن  ایچری تپیلیب هارای مدد چاغیریب دئدیم : وای ده ده ، وای ننه . خانم معلم نن خانم ناظم ایستیرلر منی اؤلدوره لر. قویمایین.

مبصورنن مدرسه نین ننه سی یئتیشیب و منیم مشق لریمین ماجراسین دا آناما ناغیل ائله دیلر. آنام حیرصلنیب ، منیم اوستومه یوگوردو. ایستیردی منی دؤیسون کی اورقیه آنام اؤزونو آتدی بیزیم ارامیزاو منی آنامین الیندن قورتاردی. منیم شانسیمدان داداش ائودئیدی. ائله بیل نوخوشویدیو، مدرسیه گئتمه میشدی . بلکی ده آللاه اونو منیم اوچون ائوده ساخلامیشدی. تئز پالتارلارینی گئییندی دئدی : گل ایکیمیز مدرسیه گئداخ. گؤروم خانم معلیمیز نه دئییر؟

دئدیم : هارا گئدیرسن ؟ خانم معلم توتار سنی ده دؤیه ر منی ده.

دئدی : یوخ ! قیز قورخما ، منی هئچ کیم دؤیه بیلمز.

دئدیم : سن بیزیم خانم معلم نن دلی ناظیمیزی تانیمیرسان . معلم ده دؤیمه سه دلی ناظیم حتمن دؤیر.

دئدی : باخ منیم بوی بوخونوما ، سن جه منیم بویوم اوجادی یا خانم معلم نن خانم ناظمین ؟

دئدیم : سنین .

دئدی : بس بیل کی منی دؤیه بیلمزلر. هله گل گئداخ گؤراخ نه دئییرلر.

آنجاق کی داداشا ارخئیین اولوب ، محکم الیندن یاپیشیب ، ننه ینن ، مبصورون قاباغینا دوشوب مدرسیه گئتدیم. خانم معلم نن خانم ناظم مدیر اتاغیندا بیزی گؤزلوردولر. خانم معلم سوفته بسم اللاه باشلادی دانیشماغا . دئدی : آقا سیزین بو باجیز همی خط لرینی غلط یازیب همی ده چکیل اویانا دئمه میشدن قویوب قاچیب.

داداش دئدی : سیزین آندیزی اینانیم یا تویوغون لله یین ؟ بئش بارماغیزین یئری هله اوزوندن گئتمییب. اللرینین ایچی ده کی قیپ قیرمیزی دی ، یوخسا بینه قیزارتماق ایستیردیز اوشاقین اللرین بینه اینن دییشیک توتوبسوز؟

خانم معلم بیلدی کی بو خینوو او خینووا بنزه مز سسینی آلچاقلاتدی . آخ اوره گیم سویودو ، آخ اوره گیم سویودو. یازیق آرواد نم نه عجب دئمه دی کی اوستونه ال قاوزادیم. بیر آز دانیشاندان سورا ، خانم مدیر کی زری خانم سسلردیلر و میزینین دالیندا سس سیز اوتوموشدو دیله گلیب دئدی : باخ قیزیم بیلیرم کی سن چوخ یاخجی قیزسان. بیر درنه شئیطان توولویوب خط لریوی غلط یازیبسان. بو دؤنه داداشیوا گؤره سنی باغیشلیرام . آما بیلیرسن کی بوردا بیزیم آنباریمیز وار . آنباردا دولودو عقربنن روتئیلینان ، پیس پیساینان. گلن دؤنه سنی بو انبارا قاتارام ها ! بیلدین ؟

بیر آز دلیل نصیحت دن سورا ، داداش دئدی : منیم خیرداجانا باجیم چوخ یاخجی قیزدی. یاخجی درس اوخویور ساکت سالم و مظلوم اوشاقدی. قول وئریر بیرده خط لرین دوز یازا. من ده قول وئریرم کی قویمویام اناسی اونو تنبیه ائیلییه. بیده بیر کیشی قیزی آختاریرام بونون اوستونه ال قاوزییا. بوگوندن ده بئله بو اوشاغین همی اتی همی ده سومویو منیم دی. هرکسین ات سوموک لازیمی دی قصابدان آلسین. بوندان سورا هر موشکول اولسا منه یازین اؤزوم گلرم.

داداش گئدندن سورا معلم نن ناظم منی بیرآز دانلادیلار سورادا معلم نن برابر کلاسا گئتدیم. اوشاغیکنخانم معلم نن خانم ناظمین بو تنبیه لری منه بیر آجی خاطره اولموشدو . اوزامان دئییردیلر بس کوتک اولماسا اوشاق یولا گلمز.

*

 

  Posts

Februar 1st, 2023

آتش بدون دود – کتاب چهارم

از عشق سخن باید گفتهمیشه از عشق سخن باید گفت.می گوید: عشق ترجیع بندی ست که هیچ رُجعتی در آن […]

Januar 28th, 2023

مادرم

آخرین فیلم ات را می بینم، شبیه فرشته ی سپید بالی هستی که داخل پنبه ی سفیدِ گلداری فرورفته و […]

Januar 20th, 2023

آتش بدون دود – دفتر چهارّم

آتش بدون دود – کتاب چهارم – واقعیتهای پرخوننویسنده: نادر ابراهیمیپدری که نفهمد بچّه اش درد دارد، پدر نیست، کُندۀ […]

Januar 16th, 2023

آتش بدون دود – دفتر سوم

در تمام سالهایی که در صحرا کار می کردم، هرگز از هیچ ترکمن آزار و اذیّتی ندیدم، امّا محبّت و […]

Januar 15th, 2023

آتش بدون دود – دفتر سوّم

آق اویلر به غم میدان داد، و غم، قانع نیست. هرچه مدارا کنی، ستیز می کند، هرچه عقب بنشینی، پیش […]

Januar 8th, 2023

آتش بدون دود

آتش بدون دود –  دفتر سوم – اتّحادِ بزرگنویسنده: نادر ابراهیمیگومیشان سرزمینِ تیراندازانِ آرامآقشام گلن در گومیشان زندگی می کند […]

Dezember 28th, 2022

آتش بدون دود – دفتر دوّم

آتش بدون دود –  دفتر دوم – درختِ مقدّسنویسنده: نادر ابراهیمیمن نه یموتم نه گوگلان، من ترکمنم و ایرانی ام، […]

Dezember 22nd, 2022

آتش بدون دود – کتاب اوّل

آتش بدون دود – کتاب اول – گالان و سولمازنویسنده: نادر ابراهیمیآتش بدون دود نمی شود و جوان بدون گناهآلاو […]

Oktober 28th, 2022

حالمان بد گشته و غم می خوریم

امشب حال و احوالم تعریفی ندارد. تلویزیون را باز می کنم تا سرم کمی گرم شود. یکی می رقصد. رقص […]

Oktober 10th, 2022

دکتر محمود انوشه می فرماید

هرگز از جلو به یک گاو، از عقب به یک الاغ و هیچ وقت به نادان نزدیک نشوید، چون نادان […]