جاوان قارداشی اؤلن لره، ایگیت اوغلو اؤلن آنالارا، آللاه صبر وئرسین.
عزیزینم مرد آدا
گلدیم دادا فریادا
اؤزون اؤلدون قورتولدون
داغین قالدی دونیادا
*
باغچادا بار قالانا
باغبان ساخلار آلانا
گئتدین رحم ائیله مه دین
گؤزو آغلار آنانا؟
*
گؤزلرین آلاسینا
قاشلارین قاراسینا
قوی آنان قربان اولسون
اوره یین یاراسینا
*
عزیزینم زیل قارا
گؤندر گئیسین زیل قارا
اوغلو اؤلن آنالار
گئینرلر زیل قارا
*
یاییلدی گون باغلارا
شئح دوشدو یارپاقلارا
حیف آلا گؤزلرین
قاریشدی توپراقلارا
*
خوروز بان وئرن یئرده
یارام قان وئرن یئرده
آنالار ساچین یولسون
اغلو جان وئرن یئرده
*
عزیزیم تیکه – تیکه
دوغراندیم تیکه – تیکه
آغ ساچلاریمی یوللام
کفنین تیکه – تیکه
*
بولاغین باشی ایله
دیبینین داشی ایله
سنی مزارا قویدوم
گؤزومون یاشی ایله
*
اوغول دینمه رم سن سیز
دئییب گولمه رم سن سیز
داغدا جئیران مله سه
بیل کی او منم سن سیز
*
آی ندن گولدو گئتدی
گئجه نی بؤلدو گئتدی
اجل امان وئرمه دی
ایگیدی گؤتدو گئتدی
*